BAKI,VOA

Yaşadığı dövrün tanınmış mühəddislərindən idi. Şeyx Əbu İshaq İbrahim Urməvinin (öl. 1292) nəticəsi, Əbu Abdullah Muhəmməd Urməvinin (öl. 1312) isə nəvəsi idi. H. 735-ci ildə (1334) alim ailəsində anadan olmuşdu. Onun anası Zeynəb məşhur mühəddislərdən birinin qızı idi. Təəssüf ki, Şəmsəddin Səxavi bu şəxsin adını sadəcə "Kamaləddin" olaraq qeyd etmişdir.

Elm məclisləri və dərs aldığı mühəddislər

Müəllif Zəkiyəddin Urməvinin uşaq yaşlarından etibarən babasının dostları olan mühəddislərin məclislərində iştirak etdiyini bildirmişdir. Onun hədis dinlədiyi kişi alimlər:

Yusif ibn Əbdürrəhman əl-Mizzi (öl. 1341),Elməddin Qasım ibn Muhəmməd əl-Birzali (öl. 1338),Muhəmməd ibn Əhməd ibn Təmmam ,Əbu Bəkr ibn Muhəmməd ibnü’r-Rza, Muhəmməd ibn Yusif ibn Dəvalə, Muhəmməd ibn Əbi Zöhr, Muhəmməd ibn Əbu Bəkr ibn Əbdüddaim Əhməd ibn Hazim Dəməşqi kimi alimlər olub.
Zəkiyəddin Urməvi eyni zamanda dövrünün tanınmış qadın hədis alimləri Zeynəb bintü’l-Xubbaz ,Sittülərəb bint Əhməd ibn Bədr ,Fatimə bint İzzəddin ibn Cəmaə əl-Kinanidən də dərs almışdı. Ümumiyyətlə o, qadınlı-kişili 24-dən çox alimdən hədis dərsləri almışdı.

Müdərrislik fəaliyyəti və tanınmış tələbələri

Zəkiyəddin Urməvi özü də hədis dərsləri vermiş və onun dərslərində çox sayıda tələbə iştirak etmişdir. Onun yetişdirdiyi mühüm tələbələr arasında bu adlar var:

İbn Həcər Əsqəlani
İbn Musa əl-Mərakeşi
Şihabəddin ibn Zeyd
Zəkiyəddin Urməvi h. 821-ci ilin şəvval ayında (noyabr 1418) vəfat etmişdi [1683].

Mənbə: Dosent Elnur Nəsirov/ Orta Əsrlərdə Yaşamış AZƏRBAYCANLI ALİMLƏR, fəqihlər, müfəssirlər, mühəddislər, mütəkəllimlər, ravilər, qarilər …