Bakı. AzerVoice:
Qırğızıstan Prezidenti Sadır Japarov bu gün BMT baş katibinin terrorla mübarizə üzrə müavini - BMT-nin Terrorla Mübarizə İdarəsinin rəhbəri Vladimir Voronkovu qəbul edib.
AzerVoice xəbər verir ki, görüş zamanı beynəlxalq gündəlikdəki aktual məsələlər və Qırğızıstan ilə BMT arasında əməkdaşlıq ətrafında fikir mübadiləsi aparılıb.
Japarov təşkilatın sülh və təhlükəsizliyin təmin edilməsində mühüm rolunu qeyd edib, münaqişələrin sülh yolu ilə həlli və müasir dövrün çağırışlarına qarşı birgə mübarizə üçün Qırğızıstanın BMT-nin bütün üzv dövlətləri və ixtisaslaşmış qurumları ilə sıx tərəfdaşlıq əlaqələrinin möhkəmləndirilməsinin tərəfdarı olduğunu vurğulayıb.
"Qırğızıstan bütün formalarda terrorizmi qətiyyətlə pisləyir və beynəlxalq terrorizmlə effektiv mübarizə üçün möhkəm zəmin yaradan BMT-nin Qlobal Terrorla Mübarizə Strategiyasının həyata keçirilməsində fəal iştirak edir", - deyə o əlavə edib.
BMT-nin Terrorla Mübarizə İdarəsinin rəhbəri isə qeyd edib ki, 2027-2028-ci illər üçün BMT Təhlükəsizlik Şurasının qeyri-daimi üzvlüyünə Qırğızıstanın namizədliyinin irəli sürülməsinə gəlincə, ölkənin bu yeri tutmaq şansı yüksəkdir.
O, həmçinin, Qırğızıstandan olan gənc mütəxəssislərin BMT təsisatlarında hazırlanması və təcrübə keçmələrinin təşkili sahəsində əməkdaşlığın genişləndirilməsinin nəzərdən keçirilməsini təklif edib.
Xəbərlərimizi “WhatsApp” kanalımızdan oxuyun
