BAKI,VOA, Fərid Mikayılov

Qazaxıstan qarşıdan gələn referendumla əlaqədar xaricdə fəaliyyət göstərəcək seçki məntəqələrinin sayını açıqlayıb.

VOA xəbər verir ki, Qazaxıstan Xarici İşlər Nazirliyinin sözçüsü Yerlan Jetibayev martın 10-da keçirilən brifinqdə bildirib ki, referendum zamanı 54 ölkədə yerləşən 71 seçki məntəqəsi fəaliyyət göstərəcək, təhlükəsizlik səbəbilə isə 10 ölkədə 11 seçki məntəqəsinin fəaliyyəti dayandırılıb.

Nazirlik referendumun təşkili üçün xüsusi qərargah yaradıldığını açıqlayıb.

Məlumata görə, Yaxın Şərqdə hərbi-siyasi vəziyyətin gərginləşməsi, həmçinin Ukrayna və Efiopiyada təhlükəsizlik səviyyəsinin aşağı olması səbəbindən Qazaxıstanın İran, İsrail, İordaniya, Qətər, Birləşmiş Ərəb Əmirlikləri, Oman, Livan, Küveyt, Ukrayna və Efiopiyadakı səfirliklərində yerləşən seçki məntəqələri fəaliyyət göstərməyəcək.

Bundan əlavə, Qazaxıstanın Dubaydakı Baş Konsulluğunda yerləşən seçki məntəqəsi də işləməyəcək.

Qeyd olunub ki, xaricdə yaşayan 14 min 230 Qazaxıstan vətəndaşı referendumda səsvermə hüququna malikdir.

Referendum beynəlxalq səviyyədə də geniş diqqət çəkir. Məlumata görə, səsverməni 10 beynəlxalq və regional təşkilatdan 336 müşahidəçi, həmçinin 27 ölkənin Mərkəzi Seçki Komissiyalarının nümayəndələri və Qazaxıstanda akkreditə olunmuş diplomatik korpus üzvləri izləyəcək.

Eyni zamanda referendumu işıqlandırmaq üçün 31 ölkədən 68 xarici media qurumunu təmsil edən 185 jurnalistin akkreditə olunması gözlənilir.