BAKI,VOA

Türkiyə Xarici İşlər Nazirliyi İranın Azərbaycanın Naxçıvan Muxtar Respublikasına təşkil etdiyi PUA hücumu ilə bağlı rəsmi bəyanat yayıb.

VOA xəbər verir ki, nazirlik bölgədəki gərginliyin artmasından duyduğu narahatlığı ifadə edərək, hücumu qətiyyətlə pislədiyini bildirib.

Xarici İşlər Nazirliyindən verilən açıqlamada bu ifadələr yer alıb:

"Azərbaycanın Naxçıvan Muxtar Respublikasına bu gün (5 mart) həyata keçirilən PUA hücumlarını şiddətlə qınayırıq. Bölgədə üçüncü ölkələri hədəf alan və müharibənin yayılması riskini artıran hücumlara bir an əvvəl son verilməli olduğunu bir daha vurğulayırıq".- deyə qeyd edilib.

Bəyanatda Türkiyənin Azərbaycan ilə olan qardaşlıq və strateji müttəfiqlik əlaqələrinə sadiqliyi bir daha təsdiq edilib. "Türkiyə, hər zaman olduğu kimi, bundan sonra da Azərbaycanın yanında durmağa davam edəcəyik" – deyə nazirlik qeyd edib.

Qeyd edək ki, martın 5-də Naxçıvan Beynəlxalq Hava Limanına dron hücumu olub. İran ərazisindən uçan dron aeroportun binasına və Babək rayon Şəkərabad kənd tam orta məktəbin yaxınlığına düşərək partlayıb.

Hadisə nəticəsində 4 mülki şəxs xəsarət alıb. Azərbaycan Xarici İşlər Nazirliyinin hadisə ilə bağlı bəyanat yayaraq İran İslam Respublikası tərəfindən qısa müddət ərzində qeyd olunan məsələyə aydınlıq gətirilməsini, buna izahat verməsini və bu kimi halların gələcəkdə təkrarlanmaması üçün zəruri təxirəsalınmaz tədbirlər görməyi tələb edib.

İran İslam Respublikasının Azərbaycan Respublikasındakı fövqəladə və səlahiyyətli səfiri Müctəba Dərmiçilu Xarici İşlər Nazirliyinə çağırılıb. İran tərəfinə kəskin etiraz bildirilib.