Bakı, AzerVoice
Fələstin rəhbərliyi bazar ertəsi yayımladığı bəyanatda İsrailin "vətəndaşları məcburi köç etdirmək və etnik təmizləmə aparmaq" planlarını pisləyib və ABŞ administrasiyasını müdaxilə etməyə çağırıb.
AzerVoice xəbər verir ki, Fələstin Prezident Administrasiyasının sözçüsü Nabil Əbu Rudeyne bildirib ki, İsrail işğal qüvvələri Qərb Sahilində fələstinlilərə qarşı genişmiqyaslı müharibəsini daha da genişləndirərək, məcburi köç və etnik təmizləmə planlarını həyata keçirməyə çalışır. O, xüsusilə İsrailin Baş naziri Benyamin Netanyahunun hazırda Vaşinqtonda olmasına diqqət çəkərək, ABŞ-ın dərhal müdaxilə etməli olduğunu vurğulayıb.
Tulkarm valisi Abdullah Kamil isə bildirib ki, İsrailin hərbi əməliyyatları nəticəsində Tulkarm düşərgəsinin əhalisinin 48%-i köç etməyə məcbur olub. O, İsrailin bu əməliyyatlarının Qərb Sahilindəki düşərgələrin mənzərəsini dəyişdirməyə yönəldiyini qeyd edib. Kamil, məcburi köçkünlərə sığınacaq və yardım göstərmək üçün bölgədə müxtəlif qruplardan ibarət bir komitənin yaradıldığını da bildirib.
Fələstin xəbər agentliyi WAFA isə İsrail ordusunun Cenin şəhəri və qaçqın düşərgəsində ardıcıl 14 gündür hərbi əməliyyatlar apardığını və 15 min fələstinlinin məcburi köç etdiyini açıqlayıb. WAFA-nın məlumatına görə, bu əməliyyatlarda 29 fələstinli şəhid olub, onlarla insan yaralanıb və çoxlu sayda insan həbs edilib. İsrail ordusu bazar günü Cenin düşərgəsinin şərqində eyni vaxtda 20 binanı partladıb, bu isə Cenin Dövlət Xəstəxanasının bəzi bölmələrinə ciddi ziyan vurub.
İsrail ordusunun Fəria düşərgəsi və Tubas bölgəsində yerləşən Tumun qəsəbəsini ikinci gündür mühasirədə saxladığı bildirilib. Ordunun bölgəyə əlavə hərbi qüvvələr göndərdiyi və xüsusi təyinatlı birliklərin Tubas şəhərinə girərək bir evi basqına məruz qoyduğu qeyd edilib.
Bazar günü Fələstin Prezidenti Mahmud Abbas BMT Təhlükəsizlik Şurasının təcili iclasının çağırılmasını tələb edib. O, İsrailin fələstinlilərə qarşı davam edən hücumlarını dayandırmaq və Jenin və Tulkarm düşərgələrində tam məhəllələri dağıtmasını, Tumun və Fəria düşərgələrində insanları evlərindən çıxarmaq cəhdlərini pisləyib.
İsrail ordusu isə bazar günü açıqlamasında Şimal Qərb Sahilində 50-dən çox "terrorçunu" öldürdüyünü və 100-dən çox axtarışda olan şəxsi həbs etdiyini bildirib. Ordu bəyan edib ki, 35 nəfər genişmiqyaslı hərbi əməliyyat zamanı, 15 nəfər isə hava zərbələri nəticəsində öldürülüb.
İsrail yanvarın 21-də Jenində "terror fəaliyyətini dayandırmaq" məqsədilə "Dəmir divar" adlı genişmiqyaslı hərbi əməliyyata başladığını elan edib. Bu, 2002-ci ildə İsrailin Qərb Sahilində apardığı "Müdafiə divarı" adlı hərbi əməliyyatı xatırladır. O vaxt İsrail bütün Qərb Sahilini işğal etmişdi.