BAKI,VOA, Nailə Babazadə

İspaniya hökuməti İsrail ordusunun Livanda BMT-nin sülhməramlı qüvvələrinin (UNIFIL) tərkibində xidmət edən ispan əsgərini qısamüddətli saxlamasına etiraz olaraq İsrailin Madriddəki ən yüksək rütbəli diplomatını (işlər vəkilini) Xarici İşlər Nazirliyinə çağırıb.

VOA xəbər verir ki, İspaniya Xarici İşlər Nazirliyindəki mənbələrin verdiyi məlumata görə, İsrailin işlər vəkili ispan əsgərinin İsrail ordusu tərəfindən "heç bir əsas olmadan saxlanılmasına" rəsmi etirazı çatdırmaq üçün nazirliyə dəvət olunub. Rəsmi Madrid bu hadisəni beynəlxalq hüququn və BMT-nin toxunulmazlığının kobud şəkildə pozulması kimi qiymətləndirib.

UNIFIL-in çərşənbə axşamı yaydığı bəyanatda bildirilir ki, İsrail qüvvələri sülhməramlıların logistik karvanının qarşısını kəsdikdən sonra heyət üzvlərindən birini saxlayıb. Həmin vaxt əsgərin milliyyəti açıqlanmasa da, sonradan onun İspaniya vətəndaşı olduğu məlum olub. Saxlanılan sülhməramlı bir saatdan az müddətdə sərbəst buraxılsa da, İspaniya tərəfi hadisənin qəbuledilməz olduğunu və təkrarlanmamalı olduğunu vurğulayıb.

Xatırladaq ki, İspaniya 2024-cü ildə Fələstin dövlətini tanıdıqdan sonra İsrail öz səfirini Madriddən geri çağırıb və hazırda İsrailin İspaniyadakı diplomatik nümayəndəliyinə işlər vəkili rəhbərlik edir. Son hadisə İsrailin Livandakı hərbi əməliyyatları fonunda iki ölkə arasındakı onsuz da gərgin olan diplomatik münasibətləri daha da kəskinləşdirib.