BAKI, VOA, Nailə Babazadə

BMT-nin Baş katibi Antonio Quterreş, Pakistan və Əfqanıstan arasındakı sərhəd toqquşmalarını dərin narahatlıqla izlədiyini bildirib.

VOA xəbər verir ki, o, hər iki tərəfi beynəlxalq hüquq çərçivəsindəki öhdəliklərinə əməl etməyə və mülki şəxslərin qorunmasını təmin etməyə səsləyib. Eyni zamanda, Türkiyənin xarici işlər naziri Hakan Fidan gərginliyi azaltmaq üçün Pakistan, Əfqanıstan, Qətər və Səudiyyə Ərəbistanlı həmkarları ilə intensiv telefon diplomatiyası apararaq regional sülhün qorunması yollarını müzakirə edib.

Bölgənin böyük dövlətləri də artan gərginliyə qarşı sərt reaksiyalar veriblər. Çin Xarici İşlər Nazirliyi tərəfləri dərhal atəşkəsə çağıraraq münaqişənin uzanmasının hər iki ölkə üçün ağır itkilərə yol açacağını vurğulayıb. Rusiya isə tərəfləri təhlükəli hərbi qarşıdurmalardan qaçmağa və bütün fikir ayrılıqlarını siyasi-diplomatik yollarla həll etmək üçün müzakirə masasına qayıtmağa dəvət edib. İranın xarici işlər naziri Abbas Araqçi isə mübarək Ramazan ayına diqqət çəkərək problemlərin "yaxşı qonşuluq" prinsipləri əsasında həll edilməsinin zəruriliyini bildirib.

Malayziya, İngiltərə və digər Qərb ölkələri də mülki itkilərin qarşısının alınması üçün gərginliyin dərhal azaldılmasını tələb ediblər. Xatırladaq ki, Pakistanın "terror düşərgələri" iddiası ilə başladığı əməliyyatlara Əfqanıstanın "ölçülü cavab" vədi və sərhəddə artan hərbi yığıncaq bölgəni genişmiqyaslı müharibə riskinə sürükləyir. Beynəlxalq müşahidəçilər bu böhranın yalnız vasitəçilik və birbaşa dialoq vasitəsilə həll edilə biləcəyini qeyd edirlər.