BAKI, AzerVoice, Nailə Babazadə
İndoneziyanın şərqində yerləşən Papua əyalətində 6,5 bal gücündə zəlzələ baş verib.
AzerVoice xəbər verir ki, ABŞ Geoloji Araşdırmalar Mərkəzinin (USGS) məlumatına əsasən, zəlzələnin episentri Abepura bölgəsindən təxminən 200 kilometr qərbdə olub. Yerli vaxtla saat 9:48-də qeydə alınan təkan 70,1 kilometr dərinlikdə meydana gəlib.
Hazırda zəlzələ nəticəsində hər hansı insan tələfatı və ya maddi ziyanın olması barədə məlumat verilməyib. ABŞ-ın Pasifik Sunami Xəbərdarlıq Mərkəzi isə zəlzələdən sonra sunami xəbərdarlığı edilmədiyini bildirib.
Papua, İndoneziyanın ən şərq hissəsində — Yeni Qvineya adasının qərb tərəfində yerləşir. Bu bölgə “Sakit okean atəş halqası” adlanan və dünyanın ən aktiv zəlzələ, həmçinin vulkan qurşaqlarından birinin tərkibindədir. Buna görə də burada tez-tez güclü zəlzələlər baş verir.