BAKI, AzerVoice, Nailə Babazadə

NATO-ya üzv olan 32 ölkənin müdafiə nazirlərinin iştirakı ilə regional təhlükəsizlik məsələlərinin müzakirə edildiyi NATO Müdafiə Nazirləri Toplantısı Brüsseldə başlayıb.

AzerVoice xəbər verir ki, tplantının açılışında çıxış edən NATO Baş katibi Mark Rutte əsas diqqət mərkəzinin alyansın müdafiə və çəkindirmə qabiliyyətinin gücləndirilməsi olacağını bildirib.

O, Hollandanın Haaqa şəhərində keçirilən NATO Zirvəsində qəbul edilən tarixi qərarların icrasının da müzakirə olunacağını deyib və NATO-nun yeni qabiliyyətləri və hədəflərinin müzakirə ediləcəyini vurğulayıb.

Rutte şərq cinahında təhlükəsizliyi artıran "Eastern Sentry" (Şərq Gözətçisi) təşəbbüsünün də müzakirə olunacağını bildirib.

"Eyni zamanda dronlardan qaynaqlanan yeni təhdidlərə qarşı mübarizə üçün yeni bir təşəbbüs elan edəcəyik." - deyə Rutte qeyd edib.

Rutte əlavə edib ki, NATO-nun Ukraynaya verdiyi qətiyyətli dəstək də toplantının əsas gündəm mövzularındandır.

Toplantıda regional müdafiə və təhlükəsizlik əməkdaşlığı, müdafiə xərcləri, Rusiyanın artan hava məkanı pozuntuları və Ukraynaya dəstək kimi mövzular müzakirə olunacaq.

Əsas sessiyadan sonra NATO-Ukrayna Şurası toplanacaq. Ardınca isə Ukrayna Müdafiə Əlaqə Qrupu bir araya gələcək.