BAKI, AzerVoice, Nailə Babazadə

Hökumət böhranlarının yaşandığı və iqtidarın əhalinin mənzil problemi ilə bağlı ciddi tədbirlər görməməsi ilə tənqid olunduğu Fransada evsizlərin sayı ötən illə müqayisədə 20 min nəfər artaraq 350 minə çatıb.

AzerVoice xəbər verir ki, Fransa mənşəli yardım təşkilatı – əvvəlki adı ilə "Abbe Pierre", yeni adı ilə "Yoxsullar üçün Mənzil Fondu"nun 2025-ci il üzrə hesabatına görə, ölkədə mənzil tikintisindəki durğunluq, kirayə qiymətlərinin yüksək olması və yoxsul təbəqənin mənzil probleminin həllinə yönəlik ciddi addımların atılmaması evsizlərin sayının artmasına səbəb olub.

Hesabatda qeyd olunub ki, Fransada hazırda 2,7 milyon insan sosial mənzil gözləyir. 2023-cü ildə isə bu kateqoriyaya yalnız 393 min nəfər mənzil verilib.

Hesabatda bu günə qədər mənzil böhranının həlli üçün nəzərəçarpacaq addımların atılmadığı vurğulanıb. Hökumət böhranlarının davam etməsi və siyasi iradə çatışmazlığı bu problemin daha da dərinləşməsi riskini artırır.

Evsizliklə bağlı statistikaya da toxunulan sənəddə qeyd olunur ki, 2002–2022-ci illər arasında evsizlərin sayı 1,3 dəfə artıb. Ötən il evsizlərin sayı 330 min idisə, bu il rəqəm 350 minə yüksəlib.