BAKI, AzerVoice

Roma Papası XIV Leo, İkinci Dünya Müharibəsinin başa çatmasının 80-ci ildönümünü xatırladaraq, Ukraynada, Yaxın Şərqdə və Hindistan ilə Pakistan arasında sülhə çağırış edib.

AzerVoice xəbər verir ki, bu haqda o çıxış etdiyi ilk dini moizəsində bildirib.

“İkinci Dünya Müharibəsi faciəsi 80 il əvvəl sona çatdı. O, 60 milyon insanın həyatına son qoydu. Hazırda parçalanmış bir Üçüncü Dünya Müharibəsi ssenarisinin içindəyik – bunu Papa Fransisk demişdi, və mən dünya liderlərinə səslənirəm: artıq müharibəyə yer yoxdur” – deyə, pontifik qeyd edib.

“Ukraynada ədalətli və davamlı sülhün mümkün qədər tez əldə olunması, bütün əsirlərin azad edilməsi və uşaqların ailələrinə qaytarılması üçün hər şey edilsin. Qəzza zolağında baş verənlər məni dərindən yaralayır. Mülki əhaliyə humanitar yardım göstərin və bütün girovları azad edin. Hindistan və Pakistan arasında atəşkəsin əldə olunması xəbəri məni sevindirdi. Ümid edirəm ki, yaxın vaxtlarda aparılacaq danışıqlar sülh sazişi ilə nəticələnəcək” – deyə, o əlavə edib.