BAKI,VOA,Yusif Şərifzadə

ABŞ Prezidenti Donald Tramp sağlamlıq vəziyyəti və idrak qabiliyyəti ilə bağlı tibbi müayinəsinin nəticələrini yenidən gündəmə gətirib. O bildirib ki, may ayında keçdiyi tibbi müayinənin nəticələri mükəmməl olub və idrak testindən də yüksək nəticə göstərib.

VOA xəbər verir ki, Donald Tramp sosial şəbəkə hesabında paylaşdığı açıqlamada Uolter Rid Milli Hərbi Tibb Mərkəzində keçdiyi tibbi müayinəyə toxunaraq bütün göstəricilərinin normal olduğunu bildirib. Ağ ev isə prezidentin paylaşımının may ayında keçirdiyi tibbi müayinəyə aid olduğunu açıqlayıb.

Donald Tramp qeyd edib ki, hər altı aydan bir tibbi müayinədən keçir. O əlavə edib ki, öz istəyi ilə növbəti dəfə də idrak qabiliyyətini qiymətləndirən test verib və bütün suallara düzgün cavab verib. Tramp bu testi üç dəfə uğurla keçən yeganə ABŞ prezidenti olduğunu iddia edib.

Prezident bu açıqlamaları onun hakimiyyətə qayıdışından bəhs edən yeni kitabın müəllifləri, jurnalistlər Meqqi Haberman və Conatan Svona cavab olaraq səsləndirib. Kitabda Ağ evin bəzi əməkdaşlarının Donald Trampın yaşı, fiziki dözümlülüyü və sağlamlıq vəziyyəti ilə bağlı narahatlıqlarının olduğu qeyd edilir.

Donald Tramp iyun ayında 80 yaşını tamamlayıb və ABŞ tarixində prezident vəzifəsini icra edən ən yaşlı şəxs hesab olunur. Son illərdə Vaşinqtonda yaşlı siyasi liderlərin sağlamlıq vəziyyəti və idrak qabiliyyəti ilə bağlı müzakirələr geniş yer tutur.