BAKI,VOA,Yusif Şərifzadə

Beynəlxalq Dəniz Təşkilatının Baş katibi Arsenio Dominqes Hörmüz boğazında son günlər baş verən hücumlardan sonra bütün tərəfləri təmkinli davranmağa və gərginliyi azaltmağa çağırıb. O bildirib ki, hazırda Körfəzdə yüzlərlə gəmidə təxminən 6 min dənizçi təhlükəsiz şəkildə bölgəni tərk edə bilmir.

VOA xəbər verir ki, Arsenio Dominqes yaydığı bəyanatda son iki gün ərzində Hörmüz boğazından keçən bir neçə gəmiyə edilən hücumları pisləyib. Onun sözlərinə görə, bu hücumlar günahsız dənizçilərin həyatını ciddi təhlükə altına qoyub.

Baş katib vurğulayıb ki, heç bir dənizçi sadəcə öz peşə borcunu yerinə yetirdiyinə görə həyatını riskə atmamalıdır. O, bayraq dövləti olan ölkələri, gəmi sahiblərini və operatorları ekipajların təhlükəsizliyi tam təmin olunana qədər Hörmüz boğazından keçidlərdən çəkinməyə çağırıb.

Dominqes qeyd edib ki, son hadisələr Körfəzdə təhlükəsiz şəkildə bölgəni tərk edə bilməyən təxminən 6 min dənizçi arasında qorxu, qeyri-müəyyənlik və psixoloji gərginliyi daha da artırıb.

O əlavə edib ki, dənizçilərin təhlükəsizliyi bütün tərəflər üçün ən yüksək prioritet olmalıdır və bölgədə gərginliyin azaldılması istiqamətində təcili addımlar atılmalıdır.