BAKI,VOA,Yusif Şərifzadə

İsrail rəsmiləri HƏMAS-ın Qəzzada idarəetmə qurumunu ləğv etməsi ilə bağlı açıqlamasını ciddi siyasi dəyişiklik deyil, diqqəti yayındırmağa yönəlmiş addım kimi dəyərləndiriblər.

VOA xəbər verir ki, İsrail hökuməti hələlik bu məsələ ilə bağlı rəsmi bəyanat verməyib. Bununla belə, yerli mətbuata danışan yüksək vəzifəli rəsmilər HƏMAS-ın açıqlamasını "media gedişi" və vaxt qazanmağa hesablanmış addım kimi qiymətləndiriblər.

İsrail tərəfinin iddiasına görə, HƏMAS bu yolla atəşkəs razılaşmasının və ABŞ Prezidenti Donald Trampın irəli sürdüyü planın icra olunmamasına görə məsuliyyətdən yayınmağa çalışır. Rəsmilər bildiriblər ki, İsrail Qəzzada həyata keçirdiyi hava zərbələrini və nəzarət etdiyi ərazilərin genişləndirilməsini həmin plan çərçivəsində həyata keçirilən tədbirlər kimi qiymətləndirir.

Məlumata görə, İsrailin Baş naziri Benyamin Netanyahu daha əvvəl bəyan edib ki, HƏMAS tam silahsızlaşdırılmayınca Qəzzada bərpa işlərinə başlanılmayacaq. Onun sözlərinə görə, məsələ yalnız mülki idarəetmənin dəyişdirilməsi ilə məhdudlaşmır və İsrail HƏMAS-ın tamamilə ləğv edilməsini istəyir.