BAKI,VOA,Yusif Şərifzadə
Qətərin Baş naziri və xarici işlər naziri Şeyx Məhəmməd bin Əbdülrəhman bin Casim Al Tani ABŞ və İran arasında imzalanmış anlaşma memorandumunu müharibənin dayandırılması istiqamətində mühüm addım kimi qiymətləndirib.
VOA xəbər verir ki, Şeyx Məhəmməd bildirib ki, ABŞ və İran prezidentləri arasında imzalanan memorandum nəticəsində “müharibənin dayandırılması mərhələsinə” keçid mümkün olub.
Onun sözlərinə görə, ilkin razılaşmanın əldə olunması Qətər, Pakistan və digər regional və beynəlxalq tərəfdaşların fəal iştirakı ilə mümkün olub.
Baş nazir qeyd edib ki, memorandumun əsas məqsədi müharibəni dayandırmaq və növbəti danışıqlar üçün baza formalaşdırmaqdır.
O bildirib ki, Vaşinqton və Tehran arasında müzakirə olunan əsas məsələlərə İranın nüvə proqramı, Hörmüz boğazının statusu və regional təhlükəsizlik daxildir.
Şeyx Məhəmməd əlavə edib ki, ilkin razılaşma davam edən danışıqlar prosesi üçün institusional çərçivə yaradır.