BAKI,VOA Orxan Qədirzadə

ABŞ-nin 250 illik yubiley tədbirləri çərçivəsində keçiriləcək xüsusi UFC turnirinin tam döyüş proqramı açıqlanıb. “Azadlıq 250” adlanan tədbir Ağ Evin Cənub Çəmənliyində təşkil olunacaq və iki çempionluq qarşılaşması ilə yadda qalacaq.

UFC-nin baş direktoru Dana Uayt Vaşinqtonda yerləşən Linkoln Memorialında keçirilən mətbuat konfransında çıxışı zamanı turnirin yekun döyüş kartını təqdim edib. Onun sözlərinə görə, yarış çərçivəsində ümumilikdə 12 qarşılaşma baş tutacaq.

Tədbirin əsas döyüşündə yüngül çəkidə UFC çempionu İliya Topuriya ilə müvəqqəti çempion Castin Geyci üz-üzə gələcək. Gecənin digər əsas qarşılaşmasında isə ağır çəki üzrə çempionluq uğrunda Aleks Pereyra ilə Siril Qan döyüşəcək.

Turnirin proqramına daxil edilən digər qarşılaşmalar arasında Şon O'Melli – Ayman Zahabi, Derrik Lyuis – Coş Hoekstra, Maykl Çandler – Maurisio Raffi, Bo Nikal – Kayl Daukaus və Dieqo Lopes – Stiv Qarsiya görüşləri də yer alıb.

Dana Uayt bildirib ki, yarışın mükafat fondu da artırılıb. Dünya Azadlıq Maliyyə Şirkətinin dəstəyi ilə bonus fonduna əlavə 250 min dollar ayrılıb. Bunun nəticəsində “Gecənin döyüşü” mükafatının məbləği hər qalib idmançı üçün 400 min dollara çatdırılıb.

UFC rəhbəri həmçinin yayım hüquqları ilə bağlı müzakirələrə aydınlıq gətirib. Onun sözlərinə görə, turnirin bütün qarşılaşmaları rəqəmsal yayım platforması vasitəsilə canlı yayımlanacaq.

Açıq hava şəraitində keçiriləcək tədbirlə bağlı hava durumuna dair narahatlıqlara da münasibət bildirən Dana Uayt qeyd edib ki, yağış və ya qar yarışın keçirilməsinə mane olmayacaq. O vurğulayıb ki, yalnız ildırım kimi təhlükəli meteoroloji şərait proqramda dəyişiklik edilməsinə səbəb ola bilər.

Ağ Evin ərazisində təşkil ediləcək UFC turniri ABŞ tarixində ilk belə idman tədbirlərindən biri hesab olunur. Yarış ölkənin 250 illik yubileyinin qeyd olunması proqramının əsas hissələrindən biri kimi təqdim edilir və bazar günü keçirilməsi planlaşdırılır.