BAKI,VOA Orxan Qədirzadə

Ukrayna İsveç istehsalı olan yeni nəsil “Gripen” qırıcı təyyarələrindən 20-yə qədər almağı planlaşdırır. Bununla yanaşı, İsveç Kiyevə əvvəlki modifikasiyaya aid daha 16 döyüş təyyarəsi təqdim edəcək.

Məlumat tərəflərin Ukrayna Prezidenti Volodimir Zelenskinin İsveçə səfəri zamanı verdikləri açıqlamalarda yer alıb.

İsveçin Baş naziri Ulf Kristersson bildirib ki, Ukraynaya veriləcək 16 qırıcı təyyarənin çatdırılmasına 2027-ci ilin əvvəlində başlanacaq.

Onun sözlərinə görə, Kiyev yeni nəsil “Gripen E” təyyarələrinin alınması ilə bağlı yekun razılaşmanı yaxın vaxtlarda imzalamağa ümid edir. Təyyarələrin tədarükünün isə 2030-cu ildən başlaması nəzərdə tutulur.

İsveç hökuməti açıqlayıb ki, Ukrayna qırıcıların maliyyələşdirilməsi üçün Avropa İttifaqı kreditindən 2,5 milyard avro ayırmağı planlaşdırır.

Bundan əvvəl Kiyev və Stokholm arasında 100–150 ədəd “Gripen E” qırıcısının alınmasına dair niyyət memorandumu imzalanmışdı.

Volodimir Zelenski bildirib ki, Ukrayna bütün 150 təyyarənin alınması üçün maliyyə mənbələri tapmağa çalışır.

O vurğulayıb ki, yeni qırıcıların tədarükü Ukraynanın hava hücumundan müdafiə sistemini əhəmiyyətli dərəcədə gücləndirməlidir.

2024-cü ildə İsveç Ukraynaya “Gripen” qırıcılarının verilməsi planlarını müvəqqəti dayandırmışdı. Buna səbəb tərəfdaş ölkələrin diqqətin ABŞ istehsalı olan F-16 Fighting Falcon qırıcılarının çatdırılmasına yönəldilməsi ilə bağlı müraciətləri olmuşdu.