BAKI,VOA, Fərid Mikayılov

Almaniyada Çin adına casusluq fəaliyyətində şübhəli bilinən evli cütlük saxlanılıb.

VOA xəbər verir ki, Almaniya hüquq-mühafizə orqanları ölkə vətəndaşları olan və adları qismən Xuejun C. və Hua S. kimi təqdim edilən şəxsləri Münhen şəhərində həbs edib.

Bildirilib ki, prokurorluq cütlüyün Çin kəşfiyyat qurumları ilə əməkdaşlıq etdiyini və hərbi məqsədlərlə istifadə edilə biləcək qabaqcıl texnologiyalar barədə məlumat toplamağa çalışdığını iddia edir.

İstintaq materiallarına əsasən, şübhəlilər Almaniyanın müxtəlif universitet və tədqiqat mərkəzlərində, xüsusilə aerokosmik mühəndislik, kompüter elmləri və süni intellekt sahəsində çalışan alimlərlə əlaqələr qurublar.

Qeyd olunub ki, onlar bəzi hallarda tərcüməçi və ya avtomobil şirkətinin əməkdaşı kimi təqdim olunaraq əlaqələr yaradıblar. İddialara görə, bir sıra alimlər mülki auditoriya qarşısında ödənişli mühazirələr keçirmək adı ilə Çinə dəvət edilsə də, sonradan dövlətə məxsus silah istehsalı müəssisələrinin əməkdaşları qarşısında çıxış ediblər.

Bundan əlavə, prokurorluq ölkənin müxtəlif şəhərlərində, o cümlədən Berlin və Münhendə ümumilikdə 10 nəfərlə bağlı əlavə araşdırma tədbirlərinin həyata keçirildiyini açıqlayıb. Həmin şəxslərin şübhəli deyil, potensial şahid qismində araşdırmaya cəlb olunduğu bildirilib.