BAKI,VOA, Fərid Mikayılov

ABŞ administrasiyasının Qrenlandiyada hərbi mövcudluğunu genişləndirmək planı ilə bağlı yeni məlumatlar yayılıb.

VOA xəbər verir ki, Vaşinqton rəhbərliyi Danimarka ilə Qrenlandiyada yeni hərbi bazaların yaradılması məsələsini müzakirə edir.

Məlumata görə, ABŞ adanın cənubunda üç yeni hərbi obyekt açmağı planlaşdırır. Yeni bazaların əsas məqsədinin Rusiya və Çinin Şimali Atlantikdəki fəaliyyətini izləmək olduğu bildirilir.

Bildirilib ki, müzakirələr çərçivəsində “GIUK keçidi” adlanan strateji bölgədə dəniz nəqliyyatına nəzarətin gücləndirilməsi nəzərdə tutulur. İlk mərhələdə Narsarsuaq bölgəsinin əsas namizəd olduğu qeyd edilir.

Ağ Ev ABŞ, Danimarka və Qrenlandiya arasında yüksək səviyyəli təmasların davam etdiyini təsdiqləyib. Danimarka tərəfi isə diplomatik kanalların açıq olduğunu bildirsə də, detalları açıqlamayıb.

Qeyd olunub ki, ABŞ-ın hazırda Qrenlandiyada yalnız Pituffik Space Base hərbi bazası fəaliyyət göstərir. Yeni planlaşdırılan obyektlərin isə dəniz müdafiə imkanlarını genişləndirəcəyi vurğulanır.