BAKI,VOA Orxan Qədirzadə

ABŞ-ın keçmiş prezidenti Barak Obamanın Kanadaya səfəri ABŞ siyasi arenasında yeni mübahisələrə səbəb olub.

VOA xəbər verir ki, Obama Kanadanın Toronto şəhərində keçirilən tədbirdə Baş nazir Mark Karni ilə görüşdükdən sonra Donald Trampa yaxın mühafizəkar dairələrin sərt reaksiyası ilə üzləşib.

Məlumata görə, Obama “Canada 2020” analitik mərkəzinin təşkil etdiyi tədbirdə çıxış edib və onun sosial şəbəkələrdə yayılan görüntüləri milyonlarla baxış toplayıb. Bundan sonra Tramp tərəfdarları Obamanı “kölgə diplomatiyası” aparmaqda və hazırkı administrasiyanın səlahiyyətlərinə müdaxilə etməkdə ittiham ediblər.

Mühafizəkar fəal Laura Lumer Obamanın xarici liderlərlə görüşünü “çevriliş” adlandırıb. Digər sağçı şərhçilər isə keçmiş prezidentin ABŞ qanunvericiliyində yer alan və qeyri-rəsmi şəxslərin xarici hökumətlərlə danışıqlar aparmasını məhdudlaşdıran “Loqan Aktı”nı poza biləcəyini iddia ediblər.

Demokratlar isə ittihamları siyasi manipulyasiya kimi qiymətləndiriblər. Onların fikrincə, Obamanın beynəlxalq nüfuzu və siyasi çəkisi hələ də ABŞ daxilində müəyyən dairələri narahat edir.

Analitiklər hesab edir ki, hadisə ABŞ-da dərinləşən siyasi qütbləşmənin və sosial media üzərindən aparılan informasiya müharibəsinin yeni nümunəsinə çevrilib. Xüsusilə “X” platformasında milyonlarla istifadəçinin iştirak etdiyi müzakirələr keçmiş prezidentlərin beynəlxalq fəaliyyətlərinin belə artıq daxili siyasi qarşıdurmanın predmetinə çevrildiyini göstərir.