BAKI,VOA, Fərid Mikayılov

ABŞ və İsrailin İrana qarşı hücumları ilə başlayan müharibənin 40-cı günündə əldə olunan atəşkəs fonunda Vaşinqtondan diqqətçəkən hərbi addım gəlib.

VOA xəbər verir ki, ABŞ Dövlət Departamenti Yaxın Şərq ölkələrinə ümumi dəyəri 8,6 milyard dolları aşan silah və hərbi avadanlıq satışını təsdiqləyib.

Satış bildirişinə əsasən, Qətərə 4 milyard dollar dəyərində Patriot missile system raketləri təqdim olunacaq.

Körfəz ölkəsinin ABŞ-dən əlavə olaraq 1 milyard dollar dəyərində lazer yönləndirmə dəstləri alacağı bildirilib.

Küveytə 2,5 milyard dollar həcmində inteqrə olunmuş döyüş idarəetmə sisteminin satışı da təsdiqlənib.

Bundan başqa, Birləşmiş Ərəb Əmirliklərinə 147,6 milyon dollar dəyərində dəqiq silah sistemlərinin satışına razılıq verilib.

ABŞ Dövlət Departamenti Konqresə göndərdiyi bildirişdə qeyd edib ki, sözügedən satışlar ABŞ-ın xarici siyasət və milli təhlükəsizlik məqsədlərinə xidmət edir.

Bu qərar İranla bağlı kövrək diplomatik prosesin davam etdiyi bir vaxtda regionda təhlükəsizlik balansı və hərbi hazırlıq məsələlərinin yenidən ön plana çıxdığını göstərir.