BAKI,VOA, Orxan Qədirzadə

Pakistanın Baş naziri Şahbaz Şərifin ABŞ və İran arasında atəşkəs elan etdiyi paylaşımında "Layihə/Qaralama" (Draft) ifadəsinin unudulması beynəlxalq platformalarda geniş müzakirələrə yol açıb.

VOA xəbər verir ki, Baş nazir Şahbaz Şərif "X" hesabında ABŞ, İsrail və İran arasında dərhal atəşkəs əldə olunduğunu elan edən rəsmi bəyanat yayımlayıb. Lakin paylaşımın ilk sətirində redaktə olunmamış şəkildə qalan "Layihə – Pakistan Baş nazirinin X mesajı" başlığı diqqətdən qaçmayıb. Mətnin bu formada paylaşılması bir neçə dəqiqə sonra düzəldilsə də, artıq sosial media istifadəçiləri arasında böyük rezonans doğurub.

Baş nazir öz mesajında tərəfləri 10 aprel 2026-cı il tarixində İslamabada yekun sülh danışıqlarına dəvət etdiyini və bu addımın regionda sabitlik üçün tarixi bir şans olduğunu qeyd edib. Lakin "qaralama" başlığının unudulması mesajın müstəqil bir təşəbbüsdən daha çox, "hazır şablon" və ya "kənardan diktə edilmiş mətn" olduğu şübhələrini artırıb. Bəzi istifadəçilər bu səhvi Baş nazirin həddindən artıq tələsməsi ilə əlaqələndirsə də, digərləri bunu "Vaşinqtonda hazırlanmış diplomatik ssenari"nin bir parçası kimi qiymətləndiriblər.

Tənqidlərə rəğmən, bir çox ekspertlər və sosial media istifadəçiləri formadan daha çox məzmuna diqqət yetirməyin vacibliyini vurğulayıblar. Onlar Pakistanın belə bir qlobal hərbi gərginliyin dayandırılmasında oynadığı vasitəçilik rolunu yüksək qiymətləndirərək, bu səhvin əldə olunan böyük diplomatik uğura kölgə salmamalı olduğunu bildiriblər.