BAKI,VOA,Fərid Mikayılov
Pakistanın Baş naziri Şahbaz Şərif Türkiyə, Misir, Pakistan və Səudiyyə Ərəbistanı xarici işlər nazirlərinin görüşünü dəyərləndirib.
VOA xəbər verir ki, Şahbaz Şərif sosial media hesabında paylaşdığı açıqlamada bildirib ki, Pakistanın paytaxtı İslamabadda keçirilən görüşdə iştirak edən Türkiyənin xarici işlər naziri Hakan Fidan, Misirin xarici işlər naziri Bədr Əbdülati və Səudiyyə Ərəbistanının xarici işlər naziri Feysəl bin Fərhanı qəbul etməkdən məmnun olub.
O qeyd edib ki, görüş zamanı yalnız İranda deyil, bir sıra müsəlman ölkələrində ciddi insan, iqtisadi və maddi itkilərə səbəb olan münaqişələrin tez bir zamanda dayandırılması üçün birgə səylərin vacibliyi vurğulanıb.
Baş nazir Türkiyə və Misirin bu istiqamətdə verdiyi töhfələri yüksək qiymətləndirərək, Pakistanın İran ilə ABŞ arasında dialoqun qurulmasına dəstək vermək niyyətində olduğunu bildirib.
Şərif digər paylaşımında isə Səudiyyə Ərəbistanına ölkəsinin dəyişməz dəstəyini bir daha ifadə edib.