BAKI,VOA, Fərid Mikayılov
ABŞ Prezidenti Donald Trampın Yaxın Şərqdə müharibənin tezliklə başa çata biləcəyinə dair açıqlamasından sonra qlobal fond bazarlarında yüksəliş qeydə alınıb, neft qiymətləri isə kəskin ucuzlaşıb.
VOA xəbər verir ki, beynəlxalq birjalarda investorların optimizmi fonunda Avropanın əsas fond indekslərindən biri olan STOXX 600 indeksi təxminən 2,2 faiz artıb. \
Asiya-Sakit okean regionunda Yaponiya istisna olmaqla MSCI indeksində isə artım 3,3 faiz təşkil edib.
Eyni zamanda dünya bazarında Brent markalı neftin qiyməti bir ara 11 faiz ucuzlaşaraq bir barel üçün 88 dollardan aşağı düşüb, sonradan isə itkilərin bir hissəsi bərpa olunaraq təxminən 9 faiz azalma ilə ticarət olunub.
Trampın açıqlamaları bazarlara təsir göstərdi
ABŞ Prezidenti Donald Tramp Yaxın Şərqdə davam edən müharibənin “tezliklə başa çata biləcəyini” bildirib. Bu açıqlama bazarlarda müsbət gözləntiləri artırsa da, İran hərbi rəhbərliyinin sərt bəyanatları vəziyyətin hələ də qeyri-müəyyən olduğunu göstərib.
İranın İnqilab Keşikçiləri Korpusu ABŞ və İsrailin hücumları dayandırılmayana qədər neft ixracının blokadasının davam etdiriləcəyini açıqlayıb.
Tramp isə İranın enerji ixracını bloklamağa cəhd etməsi halında ABŞ-ın daha sərt addımlar atacağını bildirib.
Analitiklər bazarlarda dalğalanmanın davam edəcəyini deyir
City Index şirkətinin baş bazar analitiki Fiona Cinkotta bildirib ki, bazarların Trampın hər bir açıqlamasına həssas reaksiya verməsi investorların qeyri-müəyyənlik şəraitində hər xəbərə diqqətlə yanaşdığını göstərir.
Onun sözlərinə görə, hazırda qlobal maliyyə bazarları əsasən siyasi açıqlamalar və geosiyasi risklərdən asılı olaraq dəyişir və yaxın dövrdə dalğalanmalar davam edə bilər.
Qlobal bazarlarda ümumi yüksəliş müşahidə olunur
Avropa fond bazarlarında Almaniyanın DAX indeksi 2,5 faiz, Fransanın CAC 40 indeksi isə təxminən 2 faiz artıb. ABŞ-da isə Wall Street indeksləri əvvəlki gün kəskin enişdən sonra yenidən yüksəlişlə bağlanıb.
ABŞ dövlət istiqrazlarının gəlirliliyi də bir qədər aşağı düşüb. 10 illik ABŞ xəzinə istiqrazlarının gəlirliliyi 4,1 faizə qədər geriləyib.
Qızıl və kriptovalyutalarda artım
Qlobal qeyri-müəyyənlik fonunda qızılın qiyməti də artaraq unsiya üçün təxminən 5184 dollar səviyyəsinə yüksəlib.
Kriptovalyuta bazarında isə Bitcoin 3 faiz artaraq 71 min dolları, Ethereum isə təxminən 2 faiz yüksələrək 2 min 68 dolları keçib.
Analitiklər hesab edir ki, Yaxın Şərqdəki münaqişənin gedişi və böyük dövlətlərin siyasi bəyanatları yaxın dövrdə qlobal maliyyə bazarlarının əsas istiqamətini müəyyən edən amillərdən biri olacaq.