BAKI,VOA,Yusif Şərifzadə

İşğal altındakı İordan çayının qərb sahilində gün ərzində İsrail ordusunun reydləri, məskunlaşma fəaliyyətinin genişləndirilməsi və mülki infrastruktura qarşı tədbirlərlə bağlı bir sıra hadisələr qeydə alınıb.

VOA xəbər verir ki, Fələstinin Wafa agentliyinin məlumatına əsasən, İsrail qüvvələri Nablusun cənubundakı Əl-Lübban əş-Şərqiyyə kəndinə reyd keçirib. Yerli mənbələrin bildirdiyinə görə, 50-dən çox hərbçi və bir neçə hərbi texnika kəndə daxil olaraq onlarla evdə axtarış aparıb və sakinləri dindirib.

Hebronun şimalındakı Beyt Ümmər qəsəbəsində keçirilən hərbi əməliyyat zamanı bir fələstinli İsrail hərbçilərinin açdığı atəş nəticəsində yaralanıb.

Salfit şəhərinin şimal-qərbində isə israilli məskunlaşmaçılar 20-dən çox portağal və limon ağacını kəsiblər.

Qüdsün Silvan məhəlləsində yaşayan bir fələstinliyə İsrail ordusu evini 10 gün ərzində özü sökməsi barədə göstəriş verib. Əks halda tikilinin İsrail qüvvələri tərəfindən söküləcəyi bildirilib.

Bundan başqa, İsrail qüvvələrinin mühafizəsi altında fəaliyyət göstərən məskunlaşmaçılar Beytləhm vilayətində yerləşən yaşayış məntəqələrindən birində məskunlaşma məntəqəsinin genişləndirilməsi işlərini davam etdiriblər.

İsrail ordusu və hökuməti qeyd olunan hadisələrlə bağlı hələlik rəsmi açıqlama verməyib. Təqdim olunan məlumatlar əsasən yerli Fələstin mənbələrinə əsaslanır və müstəqil şəkildə təsdiqlənməyib.