BAKI,VOA, Fərid Mikayılov

ABŞ və İran arasında artan gərginlik fonunda Vaşinqton İsrailin hərbi əməliyyatlarına dəstəyini bir daha təsdiqləyib.

VOA xəbər verir ki, İsrail Müdafiə Nazirliyinin açıqlamasına görə, ABŞ müdafiə naziri Pit Heqset İsrailin müdafiə naziri İsrael Katz ilə telefon danışığı zamanı İsrail ordusunun həyata keçirdiyi əməliyyatlara tam dəstək ifadə edib.

Məlumata əsasən, Heqset iki ölkənin silahlı qüvvələri arasında mövcud olan “misilsiz əməkdaşlığı” yüksək qiymətləndirib və İsrail tərəfini əməliyyatları davam etdirməyə çağırıb. O, danışıq zamanı “Sonuna qədər davam edin, yanınızdayıq” ifadəsini işlədib.

Eyni zamanda İran tərəfi də münaqişənin uzun müddət davam edə biləcəyi ilə bağlı sərt bəyanatlar səsləndirib.

İranın Hatem əl-Ənbiya Mərkəzi Qərargahının komandir müavini general Kiyumars Heydari bildirib ki, İran öz məqsədlərinə çatana və ABŞ-ə ciddi zərbələr endirənə qədər müharibəni dayandırmayacaq.

Onun sözlərinə görə, qarşıdurma yalnız İranın hədəflərinə nail olması və rəqib tərəfin bu addımlarından peşman olması ilə başa çata bilər.

Qeyd edək ki, İsrail və ABŞ 28 fevral tarixində Tehran ilə Vaşinqton arasında danışıqlar davam etdiyi bir vaxtda İrana qarşı hərbi əməliyyatlara başlayıb.

Buna cavab olaraq İran İsraillə yanaşı ABŞ hərbi bazalarının yerləşdiyi Qətər, Birləşmiş Ərəb Əmirlikləri və Bəhreyn də daxil olmaqla bəzi region ölkələrində müəyyən hədəflərə zərbələr endirib.