BAKI,AzerVoice, Fərid Mikayılov

İran Ordusunun Baş komandanı general-leytenant Əmir Hatəmi İran və ABŞ arasında mümkün hərbi qarşıdurma ehtimalına qarşı yüksək hazırlıq vəziyyətində olduqlarını açıqlayıb.

AzerVoice xəbər verir ki, Hatəmi gənc əsgərlərin mərasimində çıxışı zamanı regional təhlükəsizlik məsələlərinə toxunaraq ordunun hər an müdafiəyə hazır olduğunu bildirib.

General Hatəmi vurğulayıb ki, İran ordusu ABŞ-ın bütün hərəkətlərini diqqətlə izləyir.

“Əlimiz tətikdədir və bölgədə ABŞ-ın hər addımını yaxından müşahidə edirik. İran məhv edilə biləcək bir ölkə deyil”- deyə o bildirib.

O, İrana qarşı hər hansı hücumun İsrailin təhlükəsizliyini də risk altına atacağını qeyd edərək bildirib ki, belə bir addım bütün region üçün ciddi nəticələrə səbəb ola bilər.

Hatəmi həmçinin qonşu ölkələrin öz hava məkanlarının İrana qarşı hücum üçün istifadə edilməsinə icazə verməyəcəyini xatırladıb və bunun regional sabitliyin qorunması baxımından mühüm addım olduğunu vurğulayıb.

İran ordusunun heç bir ölkəyə qarşı hücum planının olmadığını bildirən komandan əlavə edib ki, ölkəyə yönəlmiş təhdidlər cavabsız qalmayacaq və İran hərbi rəhbərliyi istənilən ssenariyə hazırdır.