BAKI, AzerVoice, Orxan Qədirzadə
İsrailin Somali Federativ Respublikasından birtərəfli qaydada ayrıldığını elan etmiş Somaliland regionunu müstəqil dövlət kimi tanımasından sonra Türkiyə regional və beynəlxalq diplomatik təşəbbüslərini aktivləşdirib.
AzerVoice xəbər verir ki, Türkiyənin xarici işlər naziri Hakan Fidan İsrailin bu addımı fonunda bir sıra yüksək səviyyəli telefon danışıqları aparıb. Danışıqlar Misir, Səudiyyə Ərəbistanı və İordaniya xarici işlər nazirləri ilə keçirilib.
Telefon danışıqları zamanı Somalilandla bağlı yaranmış vəziyyət, Somali Federativ Respublikasının ərazi bütövlüyü məsələsi və regionda mümkün siyasi nəticələr müzakirə edilib. Eyni zamanda Qəzza zolağındakı mövcud humanitar və təhlükəsizlik vəziyyət da gündəmdə olub.
Məlumata əsasən, nazir Hakan Fidan Misirin xarici işlər naziri Bədr Abdel Ati, Səudiyyə Ərəbistanının xarici işlər naziri Faysal bin Fərhan Əl Səud və İordaniyanın xarici işlər naziri Ayman Safadi ilə ayrıca telefon əlaqələri saxlayıb.
Bununla yanaşı, Türkiyənin xarici işlər naziri ABŞ-nin Afrika üzrə yüksək səviyyəli müşaviri Massad Boulos ilə də telefon danışığı apararaq, Somaliland məsələsi və Afrika Buynuzunda yaranan vəziyyət ətrafında fikir mübadiləsi edib.
Danışıqlarda İsrailin Somalilandı tanımasının Somali Federativ Respublikasının daxili işlərinə müdaxilə xarakteri daşıdığı, bu addımın Afrika Buynuzunda mövcud olan həssas siyasi balanslara və regional sabitliyə mənfi təsir göstərə biləcəyi vurğulanıb.
Xatırladaq ki, İsrail Somaliland regionunu müstəqil dövlət kimi tanıdığını açıqlayaraq bu addımı atan ilk ölkə olub. Somali hökuməti isə Somalilandı ölkənin ayrılmaz hissəsi hesab edir və regionla bağlı beynəlxalq səviyyədə atılan istənilən addımın yalnız Moqadişo hökumətinin səlahiyyətində olduğunu bildirir.
Türkiyə rəsmi səviyyədə Somali Federativ Respublikasının suverenliyinə və ərazi bütövlüyünə dəstəyini davam etdirdiyini dəfələrlə bəyan edib.