BAKI, AzerVoice, Orxan Qədirzadə
Beynəlxalq Ədalət Məhkəməsi (BƏM) Belçikanın Cənubi Afrika Respublikasının İsrailə qarşı qaldırdığı soyqırımı işi üzrə prosesə qoşulmaq üçün rəsmi müraciət etdiyini açıqlayıb.
AzerVoice-un məlumatına görə, BƏM-in yaydığı yazılı bəyanatda Belçikanın 1948-ci il tarixli “Soyqırım cinayətinin qarşısının alınması və cəzalandırılması haqqında” Konvensiya çərçivəsində açılmış işə qoşulmaq niyyətində olduğu bildirilib.
Belçikanın müraciətində vurğulanıb ki, ölkə BƏM Nizamnaməsinin 63-cü maddəsinə əsasən bu işdə iştirak hüququndan istifadə edir. Sənəddə, xüsusilə soyqırım niyyətinin müəyyən edilməsi məsələsində Konvensiyanın daha geniş şərh edilməsinin zəruriliyi qeyd olunub.
Belçika bildirib ki, hərbi əməliyyatlarla bağlı hallarda elə bir hüquqi interpretasiya formalaşdırılmalıdır ki, bu, soyqırım niyyətinin sübut edilməsini çətinləşdirməsin və ya faktiki olaraq mümkünsüz etməsin. Müraciətdə qeyd olunub ki, beynəlxalq hüquq təcrübəsində silahlı münaqişə şəraitində törədilən əməllərin avtomatik olaraq soyqırım kimi qiymətləndirilməsini istisna edən presedent mövcud deyil.
Sənəddə həmçinin vurğulanıb ki, hərbi məqsədlərlə həyata keçirilən hücumlar da soyqırım niyyəti ilə baş verə bilər və xüsusilə uşaqlara və müdafiəsiz şəxslərə qarşı hücumlar bu niyyətin göstəricisi kimi qiymətləndirilə bilər.
Beynəlxalq Ədalət Məhkəməsi Cənubi Afrika Respublikası və İsraili Belçikanın müraciəti ilə bağlı yazılı mövqelərini təqdim etməyə dəvət edib.
Qeyd edək ki, Cənubi Afrika Respublikası 29 dekabr 2023-cü ildə İsrailə qarşı BƏM-də iddia qaldıraraq, Qəzza zolağında həyata keçirilən hərbi əməliyyatların Soyqırım Konvensiyasını pozduğunu iddia edib.
Cənubi Afrika məhkəmədən Qəzzada yaranmış ağır humanitar vəziyyətlə əlaqədar təxirəsalınmaz tədbirlərin görülməsini xahiş edib. BƏM 26 yanvar, 28 mart və 24 may 2024-cü il tarixlərində üç ayrı qərar qəbul edərək İsrailə soyqırımın qarşısının alınması üçün bütün zəruri tədbirlərin görülməsi, xüsusilə Rəfahda soyqırıma yol aça biləcək hərbi əməliyyatların dayandırılması və görülən tədbirlər barədə mütəmadi hesabatların təqdim edilməsi barədə göstəriş verib.