BAKI,AzerVoice
Avropa Komissiyası Fransanı Avropa İttifaqı qanunlarını pozmaqda ittiham edir.
AzerVoice xəbər verir ki, Brüsselin açıqlamasına görə, Fransa istehsalçılardan qablaşdırma, tekstil, telefon və bağçılıq avadanlığı kimi məhsulların üzərində “Triman” və ya “Info-tri” adlı simvollarla çeşidləmə qaydalarını göstərən nişanlar yerləşdirməyi tələb edir.
Avropa Komissiyası isə bu tətbiqin vahid Aİ bazarında malların sərbəst dövriyyəsinə maneə yaratdığını bildirir.
Qurumun fikrincə, 2028-ci ildə qüvvəyə minəcək yeni Aİ qablaşdırma qaydalarına qədər belə bir milli tələbin tətbiqi "proporsional deyil" və "bazarın birliyinə təhdiddir".
Qablaşdırma sənayesi nümayəndələri də bu yanaşmanın maliyyə baxımından yük yaratdığını vurğulayırlar. “Europen” təşkilatının baş katibi Françeska Stivens bildirib ki, “Triman” nişanı şirkətləri qablaşdırma dizaynını dəyişməyə məcbur edib, bu isə böyük xərclərə səbəb olub.
Fransa hökuməti isə cavab olaraq bildirib ki, ölkə 2028-ci ildən qüvvəyə minəcək Aİ qaydalarına uyğunlaşmağa hazırlaşır, lakin həmin vaxta qədər “Triman” nişanından imtina etmək niyyətində deyil.
Avropa Komissiyası 2023-cü ilin fevralında və 2024-cü ilin noyabrında Fransaya iki rəsmi xəbərdarlıq göndərib. Parisin bu xəbərdarlıqlara reaksiya verməməsi səbəbilə məsələ Avropa İttifaqının Ədalət Məhkəməsinə çıxarılıb.
Fransa uzun illərdir Aİ-nin iqtisadiyyatla bağlı tələblərini aşan milli qaydalar tətbiq etməsi ilə tanınır. Bu təcrübə “gold-plating” adlanır və Aİ-nin harmonizasiya səylərinə maneə kimi qiymətləndirilir.