BAKI, AzerVoice

Qəzza Hökuməti, İsrail ordusunun son 48 saat ərzində 26 "qanlı qətliam" həyata keçirərək 300-dən çox insanın ölümünə və yüzlərlə insanın yaralanmasına səbəb olduğunu açıqlayıb.

AzerVoice xəbər verir ki, hökumət tərəfindən verilən yazılı açıqlamada, İsrail ordusunun son hücumlarının Filistinlilərə qarşı kütləvi şəkildə həyata keçirildiyi bildirilib.

Açıqlamada qeyd olunub ki, hücumlar əsasən müvəqqəti yerləşmə məntəqələri, çadırlar, evlər, parklar, bazarlar və insani yardım paylama nöqtələrinə yönəldilib. Ölənlərin əksəriyyəti qadınlar və uşaqlardır.

Bundan əlavə, İsrailin səhiyyə infrastrukturuna qarşı apardığı hücumlar da vurğulanıb. Xəstəxanaların bombalanması, səhiyyə işçilərinə qarşı edilən hücumlar və həyati əhəmiyyət daşıyan mal-materialların bölgəyə daxil olmasının qarşısının alınması, Qəzzadakı səhiyyə sisteminin tamamilə çökdürülməsinə səbəb olub.

İsrailin 7 Oktyabr 2023-cü ildən bəri başlatdığı müharibə nəticəsində, 191 minə yaxın Filistinli həyatını itirib və ya yaralanıb, 11 min nəfərdən çox insan itkin düşüb.

Beynəlxalq Ədalət Məhkəməsinin hücumların dayandırılması ilə bağlı çağırışlarına baxmayaraq, İsrail bu tələbləri görməzlikdən gəlir.

Münaqişə davam edir, ABŞ və beynəlxalq ictimaiyyətin dəstəyilə İsrailin hücumları sürdürülür.