BAKI, AzerVoice, Orxan Qədirzadə

Sudanın cənub–mərkəzində yerləşən Kalogi qəsəbəsində uşaq bağçasına edilən pilotsuz uçuş aparatlı hücum 50 nəfərin ölümünə səbəb olub. Ölənlərdən 33-ü uşaqlardır. AzerVoice xəbər verir ki, bu barədə Sudan Həkimlər Şəbəkəsi məlumat yayıb.

Hadisə yerinə çatan tibb heyəti də “ikinci, gözlənilməz hücumun” hədəfinə çevrilib. Hüquq müdafiəçiləri əlavə olaraq yaxınlıqdakı üçüncü mülki obyektin də vurulduğunu bildiriblər. Hücumun Çevik Dəstək Qüvvələrinin (RSF) etdiyi ehtimal edilir. Qrupun dinc sakinləri, xüsusilə uşaqları və kritik infrastrukturu hədəf alması “beynəlxalq humanitar hüququn kobud şəkildə pozulması” kimi qiymətləndirilir.

Ərazidə rabitənin kəsilməsi səbəbindən qurbanların sayının daha yüksək ola biləcəyi qeyd olunur.

Hadisə RSF ilə Sudan ordusu arasında iki ildən çox davam edən müharibənin yeni ağır mərhələsi fonunda baş verib. Döyüşlərin mərkəzi hazırda neftlə zəngin Kordofan bölgəsinə keçib. Son həftələr Kordofanda yüzlərlə mülki şəxs öldürülüb.

UNICEF-in Sudandakı nümayəndəsi Şeldon Yet hücumu “uşaqların hüquqlarının şəkildə pozulması” adlandırıb və bütün tərəfləri dərhal hücumları dayandırmağa çağırıb.

Ötən bazar Sudan ordusunun hava zərbələri də Cənubi Kordofanın Kauda şəhərində əksəriyyəti mülki şəxs olmaqla 48 nəfərin ölümünə səbəb olub.

BMT-nin İnsan Haqları üzrə komissarı Folker Türk xəbərdarlıq edib ki, Kordofan Əl-Fəşirdəki kimi yeni qətliamlara səhnə ola bilər.

RSF isə ayrıca bəyanat yayaraq Çad–Sudan sərhədindəki PUA hücumuna görə Sudan ordusunu günahlandırıb, lakin məlumat təsdiqlənməyib.

Sudanda 2023-cü ildən bəri davam edən hakimiyyət uğrunda mübarizədə 40 mindən çox insan öldürülüb, 12 milyon sakin isə evlərini tərk etməyə məcbur qalıb. Humanitar təşkilatlar real itki sayının daha yüksək olduğunu bildirir.