BAKI,AzerVoice, Orxan Qədirzadə
Sudanın Maliyyə məsələləri üzrə dövlət naziri Məhəmməd Nur Əbdud-Dəim Əbdürrahim ölkəsinin yenidən qurulması prosesində Türkiyənin əsas tərəfdaşlardan biri olduğunu bildirib. AzerVoice xəbər verir ki, nazir türk KİV-lərə verdiyi müsahibə zamanı ölkəsinin əməkdaşlıq imkanları və prioritet istiqamətləri barədə məlumat verib.
Əbdürrahim qeyd edib ki, 2025-ci ilin mayından etibarən Sudan mülki hökumət tərəfindən idarə olunur və Baş nazir postuna Kamil İdris təyin edilib. O bildirib ki, yeni hökumətin əsas vəzifələri əsas xidmətlərin bərpası,iqtisadi və institusional islahatlara start verilməsi, ölkədə sülh təşəbbüslərinin gücləndirilməsi kimi sahələri əhatə edir.
Nazir 2023-cü ildən bəri davam edən qarşıdurmaların infrastruktur, körpülər, yollar, dövlət qurumları və biznes mühiti üçün ciddi çətinlik yaratdığını vurğulayıb. O bildirib ki, inflyasiya və işsizlik kəskin yüksəlib, xarici sərmayələr geri çəkilib, dövlət qurumları fəaliyyətini məhdudlaşdırmalı olub.
Bununla belə, mülki hökumət bərpa proseslərini başladıb və artıq müəyyən nəticələr əldə olunub. Əbdürrahim əlavə edib ki, Xartuma qayıdışlar başlayıb, məktəblər fəaliyyətini bərpa edib, elektrik və su təchizatı böyük ölçüdə bərpa olunub, Xartum hava limanının yenidən qurulması üzrə işlər yekunlaşmaq üzrədir.
Əbdürrahim Türkiyənin Sudan üçün strateji tərəfdaş olduğunu bildirib.
“Türkiyə ilə Sudan arasında tarixi münasibətlər mövcuddur və biz bu əlaqələri yeni layihələrlə daha da gücləndirmək niyyətindəyik.”-deyə o deyib.
Nazir infrastrukturun yenidən qurulması,körpülərin bərpası, şəhər təmizliyi və tullantı idarəçiliyi, yol tikintisi, dövlət qurumlarının bərpası, qızıl mədənçiliyi və ixracı kimi istiqamətlərdə Türkiyə şirkətləri ilə əməkdaşlıq imkanlarının geniş olduğunu vurğulayıb.
O əlavə edib ki, Xartumda dağıdılmış iki strateji körpü keçmişdə Türkiyə şirkətləri tərəfindən inşa edilib və onların yenidən tikintisində dəstəyə ehtiyac var.
Nazir Türkiyə Eximbankın Sudan üçün uzunmüddətli tərəfdaş olduğunu və ölkədə bir sıra milli layihələri dəstəklədiyini xatırladıb.
Sudanın təbii sərvətlərlə zəngin olduğunu bildirən Əbdürrahim hazırda ölkənin əsas ixrac sahəsinin qızıl olduğunu və bu sahədə Türkiyə ilə əməkdaşlıq imkanlarının araşdırıldığını deyib.
“İxracat tərəfdaşlarımızı şaxələndiririk. Türkiyə də bu sahədə potensial aktorlardan biridir.”- nazir deyib.
Nazir eyni zamanda Misir və Omanla da əməkdaşlıq imkanlarının nəzərdən keçirildiyini bildirib.
Sudanın qərbində, Sürətli Dəstək Qüvvələrinin nəzarətində olan Fəşir şəhərindəki vəziyyətə toxunan Əbdürrahim bildirib ki, bu regionun vəziyyəti paytaxt Xartumda aparılan yenidən quruculuq prosesinə təsir göstərməyəcək.