BAKI, AzerVoice
İtaliya və Yunanıstan arasında hərbi dəniz sahəsində əməkdaşlıq gücləndirilir. İki ölkə, hərbi gəmilərin, o cümlədən katerlərin satışı və dəniz təhlükəsizliyində əməkdaşlığın dərinləşdirilməsi məqsədilə yeni əməkdaşlıq müqaviləsi imzalayıb. Razılaşma İtaliyanın La Spezia şəhərində keçirilən “Seafuture” beynəlxalq dəniz sərgisində İtaliya müdafiə naziri Guido Crosetto və Yunanıstanın müdafiə naziri Nikos Dendias arasında əldə olunub.
İtaliya müdafiə naziri Crosetto açıqlamasında NATO və Avropa İttifaqı çərçivəsində iki ölkənin uzunmüddətli əməkdaşlığına diqqət çəkərək, “Heç bir ölkə Ukraynadan Yaxın Şərqə, Afrikadan Balkanlara qədər uzanan böhran və təhlükələrə təkbaşına cavab verə bilməz. Əsas məsələ ortaq dəyərləri ortaq qabiliyyətlərə çevirməkdir. Bu, kollektiv təhlükəsizlik və regional sabitliyin təminində vacibdir”,- deyə o bildirib.
Crosetto, İtaliya donanmasına məxsus iki gəminin gələcəkdə Yunanıstana verilməsini nəzərdə tutan sənədin imzalanmasını əməkdaşlığın konkret nəticəsi adlandırıb.