Bakı. AzerPress:
Tehran və Ər-Riyad arasında diplomatik əlaqələrin bərpasından sonra 19 dekabrdan etibarən iranlılar ilk dəfə Ümrə üçün Səudiyyə Ərəbistanına gedə biləcəklər.
AzerPress xəbər verir ki, İranın on hava limanından qalxan təyyarələr il boyu Ümrə ziyarəti üçün Məkkəyə gedəcək iranlıları daşıyacaq.
Məlumata əsasən, bu addım Körfəzdə neft hasil edən iki rəqib arasında münasibətlərin normallaşmasının əlaməti hesab olunur.
Qeyd edək ki, İran və Səudiyyə Ərəbistanı arasında diplomatik əlaqələr 2016-cı ildə Ər-Riyadın bir şiə ruhanisini edam etməsindən və Səudiyyə Ərəbistanının Tehrandakı səfirliyinə basqın edildikdən sonra kəsilib. 2016-cı ildən iranlılar yalnız Səudiyyə Ərəbistanına həcc ziyarətinə gedə bilirdilər.
Bu ilin avqust ayında Çinin vasitəçiliyi ilə İranın xarici işlər naziri Hüseyn Əmir Abdullahiyan Səudiyyə Ərəbistanının vəliəhd şahzadəsi Məhəmməd bin Salman ilə görüşüb.
Xəbərlərimizi “WhatsApp” kanalımızdan oxuyun
