BAKI,AzerVoice, Fərid Mikayılov
İranın şimal-şərqindəki Rəzəvi Xorasan əyalətində İsrail kəşfiyyat xidməti Mossad ilə əlaqəli olduqları müəyyən edilən səkkiz nəfər həbs olunub.
AzerVoice xəbər verir ki, əməliyyatlar İslam İnqilabı Keşikçiləri Korpusu Kəşfiyyat Qurumu və məhkəmə orqanlarının birgə fəaliyyəti nəticəsində həyata keçirilib.
Həbs edilən şəxslərin Mossad tərəfindən onlayn təlim aldıqları, iyun ayında İran və İsrail arasında 12 gün davam edən qarşılıqlı hücumlar zamanı ölkədəki strateji obyektlərin koordinatlarını və mühüm hərbi şəxslərə dair məlumatları İsrail tərəfinə ötürdükləri bildirilib.
Məşhəd şəhərində həm mülki, həm də hərbi rəsmilərə qarşı hücumlar təşkil etdikləri, mühüm mərkəzlərə qarşı diversiya fəaliyyətlərində iştirak etdikləri və ölkə daxilindəki separatçı qruplarla da əlaqəli olduqları vurğulanıb.
Əməliyyatlar zamanı partlayıcı və bubi tələlərinin hazırlanmasında istifadə olunan çoxlu miqdarda xammalın da ələ keçirildiyi açıqlanıb.