BAKI, AzerVoice, Fərid Mikayılov

Braziliya ilə İsrail arasında gərginlik daha da artıb.

AzerVoice xəbər verir ki, Cənubi Amerika dövləti Tel-Əvivin yeni səfir təyinatını rəsmən rədd edib.

Braziliya mətbuatının məlumatına görə, hökumət İsrailin Gali Daganı yeni səfir kimi təqdim etməsini qəbul etməyib. Dagan, ötən həftə istefa verən hazırkı səfir Daniel Zohar Zonşaynın yerinə təyin olunmuşdu. İsrail Xarici İşlər Nazirliyi də Braziliyanın bu qərarını təsdiqləyib.

İki ölkə arasında münasibətlər 2024-cü ilin fevralında pisləşməyə başlayıb. Həmin vaxt Braziliya prezidenti Luiz İnasio Lula da Silva İsraili Qəzzada soyqırımı törətməkdə ittiham etmiş, rejimin hərəkətlərini Adolf Hitler ilə müqayisə etmişdi:

“Bu, əsgərlərin müharibəsi deyil. Yüksək təchizatlı ordu ilə qadın və uşaqlar arasında aparılan müharibədir. Qəzzada fələstinlilərə qarşı baş verənlər tarixdə başqa heç bir vaxt yaşanmayıb. Əslində, yaşanıb, Hitler yəhudiləri öldürmək qərarı verəndə” – deyə o bildirmişdi.

Bundan başqa, Braziliyanın İsraildəki səfiri ötən ilin fevralından bəri geri çağırılıb və hələ də Tel-Əvivə qayıtmayıb.