BAKI, AzerVoice, Fərid Mikayılov

Fransa prezidenti Emmanuel Makron Rusiya lideri Vladimir Putinlə Ukrayna prezidenti Volodimir Zelenski arasında mümkün görüşün İsveçrənin Cenevrə şəhərində keçirilə biləcəyini bildirib.

AzerVoice xəbər verir ki, Makron 2019-cu ildə olduğu kimi görüşün Parisdə keçirilmə ehtimalını istisna edib.

“Situasiya artıq başqa mərhələdədir və neytral ölkə tapmaq lazımdır. Ola bilsin, İsveçrə, mən Cenevrəni dəstəkləyirəm. Yaxud başqa bir ölkə seçiləcək. Sonuncu dəfə ikitərəfli danışıqlar Türkiyənin İstanbul şəhərində keçirilib”- deyə Makron bildirib.

Fransa prezidenti əlavə edib ki, Vaşinqtonda ABŞ prezidenti Donald Tramp, Zelenski və Avropa liderlərinin iştirakı ilə keçirilən görüşdə də Moskva və Kiyev arasında yüksək səviyyəli təmasların mümkünlüyü müzakirə olunub. Onun sözlərinə görə, ikitərəfli danışıqlardan sonra ABŞ-ın iştirakı ilə üçtərəfli, daha sonra isə daha geniş formatda çoxtərəfli görüşlərin keçirilməsi nəzərdən keçirilir.

Makron həmçinin Avropa dövlətlərinin və Türkiyənin də belə danışıqlarda iştirak edə biləcəyini vurğulayıb.