BAKI, AzerVoice, Səməd Əyyubov

Rusiya Prezidenti Vladimir Putin və ABŞ Prezidenti Donald Trampın birgə mətbuat konfransı başlayıb.

AzerVoice xəbər verir ki, mətbuat konfransı Alyaskadakı "Elmendorf-Riçardson" hərbi bazasında yerləşən "Arctic Warrior" konqres mərkəzində keçirilir.

Səhnənin arxa fonunda “Pursuing Peace” (“Sülhə nail olmaq”) şüarı yazılmış iri baner yerləşdirilib. Səhnənin hər iki tərəfində isə Rusiya və ABŞ bayraqları quraşdırılıb.

Təxminən 200 nəfər rusiyalı və amerikalı jurnalist tədbirə qatılıb. Onların prezidentlərə suallar ünvanlaması gözlənilir. Vladimir Putin və Donald Tramp isə bir-birlərini qulaqcıqlar vasitəsilə sinxron tərcümə ilə dinləyəcəklər.

Qeyd edək ki, bundan əvvəl Alyaskada yerləşən "Elmendorf-Riçardson" hərbi bazasında iki lider arasında məhdud formatda görüş keçirilib.

Görüşdə Rusiya tərəfdən Prezidentin köməkçisi Yuri Uşakov və xarici işlər naziri Sergey Lavrov, ABŞ tərəfindən isə dövlət katibi Marko Rubio və Prezidentin xüsusi nümayəndəsi Stiven Uitkoff iştirak ediblər. Liderlər əvvəlcə qısa söhbət aparıb, daha sonra isə “üçə-üç” formatında əsas müzakirələrə keçiblər.