BAKI, AzerVoice

ABŞ Prezidenti Donald Tramp, məşhur Alkatras adasında maksimal təhlükəsizlik səviyyəsində yeni bir həbsxana inşa etmək üçün 2 milyard dollar xərcləməyi planlaşdırır.

AzerVoice xəbər verir ki, bu barədə "Axios" portalı məlumat yayıb.

Məlumata görə, daha ucuz alternativ variant da müzakirə olunur. Bu plan 1 milyard dollara başa gələ bilər.

Qeyd edək ki, dünya şöhrətli Alkatras həbsxanası 1963-cü ildə bağlanıb. Bu müəssisədə vaxtilə Al Kapone də daxil olmaqla bir sıra məşhur cinayətkarlar saxlanılıb. İndi isə Tramp adadakı köhnə tikililəri sökərək, yerində müasir və yüksək təhlükəsizlikli bir həbsxana tikməyi planlaşdırır.

Xatırladaq ki, Tramp, 1 iyul tarixində Florida ştatının Everqleyts Milli Parkında, əvvəllər tərk edilmiş hərbi təlim aerodromunun ərazisində yerləşən və ətrafı timsahlarla dolu bataqlıqlarla əhatə olunan miqrant saxlama mərkəzinin açılış mərasimində iştirak edib. Yerli hakimiyyət orqanları bu yeni təcridxananı “Aliqator Alkatrası” adlandırır. Gözlənilir ki, bu mərkəzdə 5 minə qədər insan saxlanılacaq.