BAKI, AzerVoice
ABŞ Konqresinin Nümayəndələr Palatasının üzvü, Respublikaçı Marjorie Taylor Greene İsrailin raketdən müdafiə sistemi üçün ayrılmış 500 milyon dollarlıq maliyyənin ləğv edilməsi ilə bağlı Konqresə təklif təqdim edib.
AzerVoice xəbər verir ki, Greene, Nümayəndələr Palatasında 2026-cı il Müdafiə Nazirliyi büdcəsinin müzakirəsi zamanı İsrailə göstərilən yardım üçün ayrılan vəsaitlərin azaldılmasını nəzərdə tutan bir dəyişiklik təklifi irəli sürüb.
ABŞ-ın İsraildə hərbi obyektlərin tikintisi üçün yüz milyonlarla dollarlıq hərbi yardım ayırdığı bildirilir.
ABŞ-ın dövlət borcunun 37 trilyon dolları keçdiyini vurğulayan Greene, buna baxmayaraq federal hökumətin xarici ölkələrə yüz milyardlarla dollarlıq yardım göndərməyə davam etdiyini deyib.
“Təklifim, nüvə silahına sahib olan və özünü müdafiə etmək qabiliyyətini sübut etmiş İsrailin raketdən müdafiə sistemi üçün ayrılmış 500 milyon dollarlıq maliyyəni dayandırmağı nəzərdə tutur.”- deyə Greene bildirib.
ABŞ-ın hər il İsrailə 3,8 milyard dollar xarici yardım göstərdiyini xatırladan Greene, 2024-cü ilin aprelində qəbul edilən əlavə təhlükəsizlik paketi çərçivəsində bu ölkəyə əlavə 8,7 milyard dollar ayrıldığını da qeyd edib.
İsrailin İrana qarşı hücumları ilə başlayan gərginlik dövründə ABŞ-ın Yüksək İrtifa Hava Hücumundan Müdafiə Sistemi (THAAD) raket ehtiyatlarının 15–20 faizinin İsrailin müdafiəsi üçün istifadə edildiyini bildirən Greene, bunun 800 milyon dollardan çox maliyyətə başa gəldiyini vurğulayıb.
Greene həmçinin əlavə edib: “İsrailin Qəzzada Katolik kilsəsini bombaladığını da qeyd etmək istərdim. İsrailin davam etdirdiyi bu aqressiv müharibə nəticəsində bölgədəki bütün əhali demək olar ki, məhv olma təhlükəsi ilə üz-üzədir.”