BAKI, AzerVoice

Rusiya Federasiyası Xarici İşlər Nazirliyi İsrailin Suriyaya qarşı həyata keçirdiyi son hava hücumlarını sərt şəkildə pisləyib.

AzerVoice xəbər verir ki, nazirliyin rəsmi bəyanatında qeyd olunur ki, bu hücumlar Suriyanın suverenliyini və beynəlxalq hüququ kobud şəkildə pozur və buna görə də qəti şəkildə qınanmalıdır.

Rusiya XİN-in açıqlamasında bildirilib ki, Suriya ərazisində baş verən hadisələr xüsusilə narahatlıq doğurur.

“İsrailin Suriya ərazisindəki hərbi əməliyyatları, bu ölkənin suverenliyinə və beynəlxalq hüququn prinsiplərinə ziddir. Moskva, Suriyanın suverenliyi, birliyi və ərazi bütövlüyünə hörmət edilməsinin vacibliyini bir daha bəyan edir”- deyə nazirlikdən bildirilib.

Nazirlik, həmçinin, hücumlar nəticəsində Rusiya vətəndaşlarının zərər görmədiyini qeyd edərək, rus vətəndaşlarının təhlükəsizliyinin əsas olduğunu vurğulayıb.

Xatırladaq ki, 13 iyul tarixində Suriyanın cənubundakı Süveyda vilayətində Bədəvi ərəb tayfaları ilə Dürzi silahlı qrupları arasında qarşıdurmalar başlayıb. Gərginliyin artması səbəbilə Suriya hökuməti bölgəyə təhlükəsizlik qüvvələri göndərib. Dürzi qrupların hücumları nəticəsində onlarca hökumət hərbçisi həlak olub.

İlk mərhələdə əldə edilən atəşkəs qısa müddət sonra pozulub. Ardınca İsrail ordusu Suriya təhlükəsizlik qüvvələrinə qarşı bir sıra hava hücumları həyata keçirib.

16 iyulda İsrail Hərbi Hava Qüvvələri Suriyanın paytaxtı Dəməşqdə yerləşən Prezident Administrasiyası, Baş Qərargah və Müdafiə Nazirliyi binalarını bombalayıb. Eyni gün İsrail qırıcıları Şam və Dəra şəhərlərinə də hücumlar təşkil edib.

Süveydada həmin gün hökumət qüvvələri ilə yerli silahlı qruplar arasında yenidən atəşkəs əldə olunsa da, ümumilikdə bölgədəki vəziyyət qeyri-sabit olaraq qalır. Rəqəmsal təsbitlərə görə, toqquşmalar və hava hücumları nəticəsində yüzlərlə insanın həyatını itirdiyi ehtimal olunur.