BAKI, AzerVoice

İranın xarici işlər naziri Abbas Ərakçi bəyan edib ki, inkişaf etmiş ölkələr tərəfindən tətbiq olunan birtərəfli sanksiyalar, xüsusilə siyasi motivli olanlar, iqlim dəyişikliyi və ekoloji böhranlara qarşı qlobal səyləri ciddi şəkildə zəiflədib.

AzerVoice xəbər verir ki, Braziliyada keçirilən BRİKS-in ətraf mühit və qlobal sağlamlıq mövzusunda sammitində çıxış edən Ərakçi, İrana qarşı yönəlmiş bu sanksiyaların, iqlim dəyişikliyinin dağıdıcı təsirlərinə qarşı mübarizə aparmağa çalışan ölkələr üçün real və ciddi maneələr yaratdığını bildirib.

Nazir bu sanksiyaları ədalətsiz və davamlı inkişaf və ətraf mühitin qorunması üzrə qlobal məqsədlərlə ziddiyyət təşkil edən addımlar adlandırıb.

Ərakçi vurğulayıb ki, iqlim dəyişikliyi artıq uzaq bir təhlükə deyil, bu gün milyonlarla insan üçün gündəlik həyatın tərkib hissəsinə çevrilib.

“Temperaturun artması, su ehtiyatlarının azalması, genişmiqyaslı meşə yanğınları, ekosistemlərin məhvi və iqlim səbəbli köçlər artıq reallıqdır”- deyə o bildirib.

Ərakçi bildirib ki, dünyanın ən həssas iqlim zonalarından birində yerləşən İran, daxili resurslarla su idarəçiliyi, bərpa olunan enerji və ekosistemlərin bərpası sahəsində proqramlar həyata keçirir. Lakin bu cəhdlərin dayanıqlı nəticə verməsi üçün iqlim ədalətinə ehtiyac olduğunu qeyd edib. O, sənayeləşmiş ölkələrin tarixi məsuliyyət daşıdığını və inkişaf etməkdə olan ölkələrə maliyyə və texnoloji dəstək göstərmələrinin zəruriliyini vurğulayıb.