BAKI, AzerVoice

ABŞ prezidenti Donald Tramp bildirib ki, avqustun 1-dən etibarən Cənubi Koreya və Yaponiyadan idxal olunan məhsullara 25 faizlik gömrük rüsumu tətbiq ediləcək.

AzerVoice xəbər verir ki, bu barədə Tramp "Truth Social" platformasında məlumat yayıb.

O, Cənubi Koreya və Yaponiyanın liderlərinə ünvanladığı məktublarda rüsum səviyyələrini açıqlayıb.

Tramp həmçinin xəbərdarlıq edib ki, əgər Tokio və Seul Vaşinqtona qarşı cavab olaraq qarşılıqlı rüsumlar tətbiq edərlərsə, ABŞ da öz tariflərini müvafiq şəkildə daha da artıracaq.

Xatırladaq ki, 2 aprel tarixində Tramp 185 ölkə və əraziyə aid məhsullara gömrük rüsumları tətbiq edəcəyini açıqlamışdı. Ümumi tariflər 10 faiz səviyyəsində təyin olunaraq aprelin 5-də, fərdi tariflər isə aprelin 9-da qüvvəyə minib. Elə həmin gün Tramp bəyan etmişdi ki, bəzi cavab rüsumlarının tətbiqi 90 gün müddətinə dayandırılır. Ağ Ev bu qərarın ticarət danışıqları aparıldığı üçün verildiyini izah etmişdi.

Bu müddət ərzində vahid tarif olaraq 10 faizlik rüsum tətbiq olunur. 27 iyun tarixində Tramp qeyd etmişdi ki, ABŞ təxminən 1,5 həftə ərzində bir sıra ölkələri ayrı-ayrı sazişlər imzalanmayacağı təqdirdə iki tərəfli ticarətə dair yeni şərtlərlə, o cümlədən ABŞ bazarına gətirilən məhsullara tətbiq ediləcək tariflərlə bağlı məlumatlandıracaq.