BAKI, AzerVoice

ABŞ-da hakim Respublikaçılar Partiyasının üzvləri, İlon Maskın 2026-cı ildə keçiriləcək Konqres seçkilərində onların mövqelərini zəiflədə biləcəyindən narahatdırlar.

AzerVoice xəbər verir ki, bu barədə "The Hill" qəzeti məlumat yayıb.

Son həftələrdə İlon Mask, dövlət borcunun yuxarı həddinin 5 trilyon dollar artırılmasını nəzərdə tutan dövlət xərcləri haqqında qanun layihəsini dəstəkləyən respublikaçıları sərt şəkildə tənqid edib. Hazırda ABŞ-ın dövlət borcu 36 trilyon dolları ötüb. Mask bildirib ki, həmin qanun layihəsinə səs verən respublikaçı qanunvericilərin rəqiblərinə 2026-cı il aralıq seçkilərində dəstək verməyə hazırdır. O, səylərini əsasən ilkin seçkilərə yönəldəcəyini açıqlayıb. Bu mərhələdə respublikaçılar, Demokratlarla rəqabət aparacaq namizədləri seçirlər.

Nəşr yazır ki, bir çox respublikaçı Maskın bu açıqlamalarını qeyri-konstruktiv sayır. Onların fikrincə, əgər Mask təhdidlərini reallaşdırarsa, bu, onsuz da tarixi baxımdan hakim partiyalar üçün əlverişli olmayan bir mühitdə resursların parçalanmasına gətirib çıxara bilər. Respublikaçılar Partiyasının Senat seçkiləri üzrə ixtisaslaşmış siyasi müşaviri bildirib ki, partiyadaxili mübarizəyə külli miqdarda resurs xərcləmək, aralıq seçkilərdə ən dağıdıcı davranış nümunələrindən biridir və bu, tez-tez uğursuzluqlarla nəticələnir.

Qeyd edək ki, ABŞ Prezidenti Donald Tramp iyulun 4-də sözügedən qanun layihəsini imzalayıb. Layihə iyulun 1-də Senatda, iyulun 3-də isə Nümayəndələr Palatasında qəbul olunub. Respublikaçılar hər iki palatada hazırda çoxluğa sahibdirlər. Qanun layihəsi Vaşinqton administrasiyasının təşəbbüsü ilə hazırlanıb və bir sıra sahələr üzrə vergi və dövlət xərclərinin əhəmiyyətli dərəcədə azaldılmasını nəzərdə tutur. Bununla yanaşı, müdafiə sahəsinə, xüsusilə “Golden Dome” (Qızıl Günbəz) adlı raketdən müdafiə sisteminin yaradılmasına böyük maliyyə ayrılması planlaşdırılır. Həmçinin sərhəd nəzarətinin gücləndirilməsi və bu istiqamətdə xərclərin artırılması da layihəyə daxil edilib.