BAKI, AzerVoice
ABŞ prezidenti Donald Tramp Yaxın Şərqdəki hazırkı silahlı münaqişə zamanı həm İranın, həm də İsrailin “əzildiyini” bildirib.
AzerVoice xəbər verir ki, Tramp bu barədə Ağ Evdə keçirdiyi mətbuat konfransında danışıb.
“Onlar yorulublar. İsrail də yorulub. Mən hər ikisi ilə məşğul olmuşam. Hər iki ölkə bu münaqişənin həllini istəyirdi” - deyə, Tramp vurğulayıb.
O, həmçinin İranın ali lideri ayətullah Seyid Əli Xameneinin iyunun 26-da xalqa etdiyi müraciətinə cavab olaraq bəyanat hazırladığını açıqlayıb.
“Mən kiçik bir bəyanat hazırlayıram, ayətullahın dünənki çıxışına cavab verəcəyəm” - deyə, o bildirib.
“Baxın, siz böyük inanca sahib birisiniz, ölkənizdə çox hörmət edilən birisiniz, amma həqiqəti deməlisiniz: sizi paramparça etdilər. İsrail də dağıldı. Hər ikisi əzildi – həm İsrail, həm İran. Bu münaqişəyə son qoymaq üçün əla vaxt idi” - deyə, o əlavə edib.
Trampın fikrincə, İran və İsrail bir-birilərinə qarşı “nifrət püskürdülər”. ABŞ prezidenti İranı nəzərdə tutaraq deyib ki, “o yer tamamilə bombalanıb”.
Xatırladaq ki, İsrail Hərbi Hava Qüvvələri iyunun 13-də İran ərazisinə hava zərbələri endiriblər. Zərbələr nəticəsində çoxlu sayda yüksək səviyyəli hərbçi, o cümlədən İran Silahlı Qüvvələri Baş Qərargah rəisi Məhəmməd Baqeri, İran İslam İnqilabı Keşikçilər Korpusu (SEPAH) baş komandanı Hüseyn Salami, Xatəm Əl-Ənbiya Qərargahının komandanı Qulaməli Rəşid, 6 nüvə alimi və yüksək vəzifəli şəxslər ölüb. İran BMT Təhlükəsizlik Şurasının hadisə ilə əlaqədar fövqəladə iclas keçirməsini istəyib.
Bu hücumlara cavab olaraq isə İran Ordusu İsrailə qarşı "Doğru vəd III" adlı əməliyyat keçirib. Təl-Əviv, Qüds və digər bölgələrə yüzlərlə ballistik raket buraxılıb.
ABŞ isə münaqişənin gərginləşməsindən doqquz gün sonra – 22 iyun gecəsi İrandakı üç nüvə obyektinə hücum etməklə münaqişəyə qoşulub. 23 iyun axşamı İran ABŞ-ın Qətərdə yerləşən və Yaxın Şərqin ən böyük Amerika bazası olan Əl-Udeyd bazasına raket zərbəsi endirib. ABŞ hakimiyyət orqanlarının verdiyi məlumata görə, hücum nəticəsində itki və ya ciddi dağıntı qeydə alınmayıb.
İyunun 24-də ABŞ prezidenti Donald Tramp İsrail və İranın tam atəşkəsin qüvvəyə mindiyini bəyan edib. İsrail tərəfi də ABŞ-ın atəşkəs təklifini qəbul etdiyini və qarşıya qoyulan bütün məqsədlərə nail olunduğunu bildirib.