BAKI, AzerVoice

ABŞ İrana 30 milyard dollarlıq nüvə yardımı təklif edə bilər.

AzerVoicexəbər verir ki, ABŞ prezidenti Donald Trampın administrasiyası 12 günlük müharibənin atəşkəslə başa çatmasından sonra İranı danışıqlar masasına qaytarmaq üçün yeni təşəbbüslər üzərində işləyir.

CNN-in məlumatına görə, bu təşəbbüslər arasında İranın yalnız mülki enerji məqsədi daşıyan nüvə proqramları üçün 30 milyard dollarlıq yardım paketi də var.

Mənbələrin bildirdiyinə görə, Ağ Evdə Trampın xüsusi nümayəndəsi Stiv Witkoff ilə Körfəz ölkələrindən olan tərəfdaşlar arasında keçirilən qapalı görüşlərdə bu yardım planı geniş şəkildə müzakirə olunub. Yardımın ərəb ölkələrinin maliyyə dəstəyi ilə təmin edilməsi nəzərdə tutulur.

Eyni zamanda danışıqlar çərçivəsində uranın zənginləşdirilməsi fəaliyyətlərini ehtiva etməyən proqramların dəstəklənməsi, bəzi sanksiyaların yüngülləşdirilməsi və İranın xarici bank hesablarında dondurulmuş 6 milyard dollara çıxışına imkan yaradılması da gündəmdədir.

Qeyd edək ki, ABŞ-ın İrana qarşı hücumlarından sonra Vaşinqtonla Tehran arasında əlaqələrin yenidən qurulması məqsədilə diplomatik səylər intensivləşib. Tramp administrasiyası bu addımlarla bölgədə sabitliyi təmin etməyə çalışır.