BAKI, AzerVoice

ABŞ-ın gizli planı üzə çıxdı - Tramp və rəhbər şəxslər üçün bunker və təyyarə hazırdır.

AzerVoice xəbər verir ki, İsrail və İran arasında əldə olunan atəşkəs bölgədəki gərginliyi müvəqqəti olaraq azaltsa da, ABŞ-da diqqətçəkən və uzun illərdir sirr kimi qorunan “Qiyamət Planı”nın yenidən gündəmə gəlməsi beynəlxalq medianın maraq dairəsinə çevrilib.

Daily Mailin yaydığı məlumata görə, ABŞ hökumətinin fövqəladə vəziyyətlər üçün hazırladığı bu planın rəsmi adı “COOP” – yəni “Əməliyyatların Davamlılığı Planı”dır. Planın əsas məqsədi nüvə müharibəsi və ya genişmiqyaslı böhranlar zamanı ölkənin idarəçiliyini fasiləsiz davam etdirməkdir. Bu məqsədlə prezident Donald Tramp və digər yüksək rütbəli rəsmilər xüsusi bunker və təyyarələrlə qorunacaq.

Sığınacaqlara Virciniyadakı Mount Weather, Pensilvaniyadakı Raven Rock və Koloradodakı Cheyenne Mountain kompleksləri daxildir. Bu obyektlər nüvə hücumlarına davamlı infrastruktura malikdir və 11 sentyabr hadisələrindən sonra belə mərkəzlərə yüksək rütbəli şəxslərin təxliyəsi artıq həyata keçirilmişdi.

ABŞ-ın “Qiyamət Təyyarəsi” kimi tanınan Boeing E-4B model təyyarəsinin 17 iyun tarixində Luizianadan Merilendə uçması isə bu planın aktivləşdirilə biləcəyi ehtimallarını daha da gücləndirib. Məlumata görə, bu təyyarə müharibə şəraitində ABŞ Silahlı Qüvvələrinin baş komandanlığı funksiyasını yerinə yetirə bilir.

Qeyd edək ki, “COOP” planı ilk dəfə 1950-ci illərdə Prezident Duayt Eyzenhauer tərəfindən hazırlanıb və hər prezident dövründə yenilənərək bu gün də qüvvədə saxlanılır. Federal Fövqəladə Halların İdarə Olunması Agentliyi (FEMA) planın icrasına nəzarət edən əsas qurumdur.

Bu strateji plan təkcə nüvə müharibəsi deyil, həm də təbii fəlakətlər, terror hücumları və genişmiqyaslı kiber təhlükələrə qarşı tətbiq oluna bilər. Sığınacaqlar tam hazır vəziyyətdədir: Mount Weather güclü rabitə sistemi ilə, Raven Rock hərbi baza funksiyası ilə, Cheyenne Mountain isə NORAD-ın alternativ qərargahı kimi fəaliyyət göstərir.