BAKI, AzerVoice

Vaşinqton administrasiyası hazırda Çinin İrana hərbi dəstək göstərəcəyinə dair heç bir əlamət və ya sübut görmür.

AzerVoice xəbər verir ki, bu barədə Ağ Evin mətbuat katibi Kerolayn Livitt bildirib.

O əlavə edib ki, Pekinin İsrail-İran münaqişəsinin diplomatik yolla həlli üçün vasitəçilik təklifi ilə bağlı açıqlamalara, ABŞ prezidenti Donald Tramp mövqe bildirmədən əvvəl, şərh verməyəcək.

Livitt, Tramp ilə Çin Xalq Respublikasının sədri Si Cinpin arasında “çox hörmətə əsaslanan və isti münasibətlər” olduğunu vurğulayıb. Onun sözlərinə görə, ABŞ və Çin arasında bir çox ortaq strateji maraqlar var.

Xatırladaq ki, İsrail Hərbi Hava Qüvvələri iyunun 13-də İran ərazisinə hava zərbələri endiriblər. Zərbələr nəticəsində çoxlu sayda yüksək səviyyəli hərbçi, o cümlədən İran Silahlı Qüvvələri Baş Qərargah rəisi Məhəmməd Baqeri, İran İslam İnqilabı Keşikçilər Korpusu (SEPAH) baş komandanı Hüseyn Salami, Xatəm Əl-Ənbiya Qərargahının komandanı Qulaməli Rəşid, 6 nüvə alimi və yüksək vəzifəli şəxslər ölüb. İran BMT Təhlükəsizlik Şurasının hadisə ilə əlaqədar fövqəladə iclas keçirməsini istəyib.