BAKI, AzerVoice
Finlandiya parlamenti, ölkənin piyada əleyhinə minaların istifadəsini qadağan edən Ottava Müqaviləsindən çıxmasına dair qanun layihəsini təsdiqləyib.
AzerVoice xəbər verir ki, bu barədə Finlandiyanın Yayım və Televiziya Şirkəti (Yle) məlumat yayıb.
Məlumata əsasən, qərar NATO-da olan qonşu ölkələrin – Latviya, Litva, Estoniya və Polşanın atdığı addımları izləyərək qəbul olunub.
Parlamentdə keçirilən səsvermə zamanı 157 deputat qərarın lehinə, 8 nəfər isə əleyhinə səs verib. Müqavilədən rəsmi şəkildə geri çəkilmə, BMT-yə bildiriş göndərildikdən altı ay sonra qüvvəyə minəcək.
Qeyd edək ki, piyada əleyhinə minaların istifadəsini, istehsalını, saxlanmasını və ötürülməsini qadağan edən Ottava Müqaviləsi 1999-cu ilin mart ayında qüvvəyə minib. Finlandiya bu müqaviləni 2012-ci ildə imzalayıb. Lakin ABŞ, Rusiya, Çin, Hindistan və Pakistan müqaviləyə qoşulmayıb.